Ye una organización asturiana de ñatura fundacional, benéfico-cultural y ensin ánimu de porgüeyu. El so ámbitu de trabayu ye’l territoriu asturianu anque nun desdexa’l facer llabor en territorios venceyaos hestórica y culturalmente con Asturies tanto dientro o fuera del estáu español.
La Fundación Belenos tien como fin l’estudiu, caltenimientu y arramamientu de la cultura asturiana en toles sos manifestaciones, sobre too aquelles que conformen el so corpus tradicional y el so raigañu cultural. Pal cumplimientu d’estos fines la Fundación desendolcará les actividaes que van darréu:
- Facer investigaciones, por sí mesma o a medies con otres entidaes, en cualesquier disciplina del conocimientu arreyada cola cultura asturiana, como: hestoria, xeografía, filoloxía, etnografía, folclor ya otres.
- Fomentar la proteición, caltenimientu, rehabilitación, restauración y recreación del Padrimoniu Cultural Asturianu mueble y inmueble, material y inmaterial.
- Facer llabor de catalogación y inventariu d’esti Padrimoniu Cultural Asturianu.
- Promocionar y diseñar Cientros y/ o espacios onde recopilar, estudiar y amosar cualesquier tipu de fondos y materiales arreyaos cola cultura asturiana (artísticos, arqueolóxicos, etnográficos, bibliográficos, fotográficos, fonográficos, documentales ya otros) encargándose del so curiáu, caltenimientu y archivu. Lo que tamién podrá facer a medies con otres entidaes tanto públiques como privaes.
- Producir, editar y esparder en cualesquier tipu soporte o formatu, trabayos de creación, investigación y estudiu venceyaos colos fines de la Fundación.
- Entamar tou tipu d’actos públicos como congresos, seminarios, conferencies, amueses, festivales ya otros, enfocaos a la divulgación de la cultura asturiana en cualesquier de les sos manifestaciones.
- Dar premios que vaigan nel sen del reconocimientu públicu de persones y entidaes, destacaes pola so aportación en cualesquier materia venceyada colos fines d’interés xeneral que persigue la Fundación.
- Establecer canales d’información y intercambeu con particulares y entidaes afines de tol mundu, que faigan afayaízo la andecha de proyeutos comunes col envís de favorecer la relación intercultural.
